कइसन ई दौर आइल बा..!
शिक्षा खातिर गाँव घर छुटल
शहर त अबकी धराइल बा
साइकिल छोड़ आदमी मोटर साइकिल प आइल
त मोटरकार के कमी बुझाइल बा
बीघा बेच के कठा किनाइल
ई कइसन सौदाई बा
2 गज के चार दीवारी मे मन बड़ा उजबुजाईल बा
आज फिरु गाँव के इयाद आइल बा।
रोजगार खातिर गाँव छुटल
शहर त अबकी धराइल बा
एहिजा के हो हल्ला मे
मन बड़ा उजबुजाइल बा
प्यार के भाषा बोले ना केहू
सभे आपन अइठान में इतराइल बा
आज फिर हमरा गाँव के इयाद आइल बा
बेहतर इलाज खातिर गाँव छुटल
शहर त अबकी धराइल बा
ब्लड प्रेशर और सुगर एहिजा
हर घर में लेले अंगड़ाई बा
गाय बेच कुकर पलाइल
लोग गजबे बउराइल बा
भरल पुरल परिवार के टूटे से
सभके जीवन मुरझाइल बा
जीवन के हो रहल भाग दउड़ में
परान बड़ा कसमसाइल बा
हो कइसन ई दौर आइल बा
हो कइसन ई दौर आइल बा….
